Im Jänner 2019 hätty nid im Draum draa dänggd dassy no in däm Joor wurd aafoo Basler-Faasnachtsmärsch z komponiere!

 

Aber dasch jo s tolle im Lääbe, dass me am Änd nie ka wisse was no uff aim zuekunnt:

Ych dängg s het drmit aagfange dass mer my Oma als glaine Bueb emol e Piccolo kauft het...

 

Dr Räscht vor Gschicht isch e Verkettig vo glungene Zuefäll und scheene Bekanntschafde:

 

D Helen isch Voordräblere bi de "Rümpf" und die hänn so scheen pfyffe dassi mi noch iiber vierzig Joor entschiide ha, wider mitem Pfyffe aazfoo! S Piccolo hani mer denn wider ney miesse kaufe im März, aber scho im April hets denn beraits en Eggerkopf griegt.

 

Kurz druffabe hani Bekanntschaft gmacht mitem Gérald, und dä het nit lang umegmacht: Im Juni hani aafo schryybe und inn de Summerfeerie hani in dr Bretagne beraits d Uffnaaam vo mym Erschtling, em 'Rümpfli' gmailt griegt!

 

So isch dr Marsch denn au gwidmed dr Helen, de "Rümpf" und em Gérald und dr Ufftaggd zu vylne andere Komposizioone erfolgt!

 

4-schdimmig mit fakuldaddyyvem Basspiccolo (er deent scho scheener mit), 6 Värs, Grunddoonart D-Dur, wäggselndy Taggdaarte (4/4, 2/4, 3/4), Drummelteggschd vom Urs Gehrig

 

Feschtligy Fanfaare ereffne dr erschdi Värs, dr zwait isch inschbyriert vomene Beery-Zyddaat

(inklusive de obligadoorische Taggdwäggsel), dr dritt isch e scheeny Iiberfaart mit dr Minschder-Fääri vom Glaybasel under d Pfalz. S g-moll vom Vierte bringt e weemietygi Melodyy uss dr Fäärny wome an Basel dänggd... Dr fimft bringt denn d Erleesyg in G-Dur: Ändlig zrugg an Rhy! S Rümpfli ändet mit Värs 6 in D-Dur, emene scheene "Proscht!", dr zwayte Referänz an B.B., und ere polyfoone und polyrhrythmische Schlussgruppe

 

s Rümpfli (4.7.2019)