E vierschdimmige, feschtlige Marsch mit erwydderede Form, Rhythmus und Harmonieelemänd fir progressyyvi Clique
Ych hami seer driiber gfreyt dass sich em Urs Gehrig und my Wääg noch langer Zyt wiider ggrytzt hänn, mir sinn e Staiwurf voonenand im glyyche Dorf uffgwaggse! Fir mi isch das Aalass gsii, myni Märsch no progressyyver usszrichde, und emene Drummelteggschd-Komponischd vyl Ruum z loo. Dr Münschterblatz isch dr erschd vo deene!
Dr erschd Värs ereffnet in G-Dur im 4/4-Taggd mitem Hauptmoddyyv und ere im Vordersatz beraits kompläggse Rhythmigg, dr Noochsatz bringt nocheme Taggdwäggsel in 2/4-tel e chromaadischy Segguänz wo inere ungraade Aazaal Täggd (und inn dr Wiiderhoolyg sogar im 3/4-Taggd) ändet. S Hauptmoddyyv isch faasnächtlig-feschtlig. Dr zwait Värs in e-moll blybt im 4/4-Taggd, s Moddyyv isch en Umkeeryg vom Seqquänzmoddyyv vom Erschde wo duure glains Beery-Zyddaad (us em 'Sodeli') underbroche wird. Im dritte Värs griegt s Haupttheema vom Erschde dur d Variazioone inn de Oberschdimme und dr bewegt-duurezoogeni, in dr Segguänz chromaadischy Bass e ganz anderi, vor allem Voraaschryddendi Wiirggig. Ganz am Schluss wird d Hauptdoonart G-moll zur Dominante und duure Doonartwäggsel nach c-moll und e Taggdwäggsel nach 3/4 hani brobiert, dä Määrlihaft Bligg vor Pfalz zrugg ufe Münschterblatz ann dr Mäss z verddoone wo s Riiseraad langsam dräyt. D Segguänz wo jetzt nimm chromaaddysch isch versterggd dä Momänt. Im 5-te Värs ischs Moll uffglöst und s Moddyyv vom Vierte wird duure Pause uffe dritty Schlaag versterggd: Voorem Münschder heert me wider feschtligy Faasnachtsmuusig, im Värs 6 heertme vor dr Segguänz anschdell vom aigentlyge Haupttheema e Huuch vomene Marsch vom René Brielmann. Dr letschd Värs schliesst dr Krais vo däm Marsch dur die Drioolisch variierty Segguänz und d Schlusscoda.
Dr Münschterblatz isch mit und au ooni Basspiccolo pfyffbar