E vierschdimmige Marsch inschbiriert vom idyllische Richi (dr Wagner und sy Siegfried-Idyll) und vyl Platz fire Drummelteggschd. Dr Gestus vor Musyg isch nostalgisch-verggläärt, nid kontraschdierend und ych ha dänggd dass das ainyge Clique kennty Freyd mache!
Noch de letschde, komplizierte Märsch schdeen doo d Formschbiilereye nimm eso stargg im Voordergrund. Drfir hets e baar ungwoont hoochy Deen und d Värs schdyyge dr Quintezirggel durab...
Dr erschdi Värs in A-Dur isch e Paraphraase (Neykomposizioon nocheme beschdeende Stigg) vom erschde Theema vom 'Siegfried-Idyll', bringt in de Täggd 13 und 14 e formal beschleinygddi Segguänz, blybt aber idyllisch. S hoche Gis in dr Erschde duet mer laid, aber s isch nid anders gange... Dr zwaity Värs in D-Dur isch frey sinniert und fliesst noochem Trugschluss im Taggd 26 noch h-moll. Im dritte Värs wo vo G-Dur nach C-Dur goot hätt dr Beery beschdimmt e 'p' oder 'pp' verlangt... ych has bim ene 'mf' gloo, aber bitte pfyffet so verggläärt wie meeglig! Dreymool roote in wellere Doonart dr Viert schtoot: Naddyrlig F-Dur (s goot bislang scheen dr Quintezirggel durab). Hauptmoddyyv und freys Moddyyv vom Zwaite wärde usserdäm vermischt. Värs 5 goot uffsmol im Zirggel zrugg in die ander Richdig noch C-Dur. Die donaali Änderig wird mitere im Charaggder veränderete Variazioon vom Thema 2 understitzt, e perseenligy Zämmefassig wiene Kommenddar. Und ere abschdyygende Segguänz wooni denn ändlig E-7 ka aahängge: S mues jo zrugg noch A-Dur zem im 7te Väs dr Erscht z Widerhoole und alles abzrunde.