E dreyschdimmige tradizionelle Faasnachtsmarsch oony formaaly Expeerimänd!
E aifachy Dreyklangsbrächig vom Grunddoon zer Quinte und dr abschtyygend 5-Doon-Ruum geen im erschde Värs mitem Voordersatz tradizionell uff d Dominante und em Noochsatz wiider zrugg noch G-Dur. Värs 2 bringt eebeso draadizionell en ussem erschde Moddyyv abglaitets zwaits Theema uff dr Dominante D-Dur wo zrugg in d Hauptdoonart fiert wo aaschliessend dr erscht Värs wiidereholt wird. Dr dritty Värs in dr Subdominante C-Dur nimmt d Drioole wiider uff, erwydderet d Dreiklangsbrächig umene Doon, goot im Voodersatz eebefalls uff d Dominante blibt im Noochsatz noochere glaine Segguänz aber in C-Dur. Värs 4 isch wiiderum uff dr Subdominante (dismool vo C-Dur in F-Dur) mitem glyyche donaale Material, d Dreyklangsbrächig goot dismool noch obe und dr punggdiert Schlaag schdoot am Aafang. In dr Paralleldoonart d-moll wird s Material e Wytermool duuregfiert. Es folgt e 'da capo' vor Värs 1-2-Kombinazioon. Värs 7 bringt e wyteri Variazioon vom Haupttheema, isch wie dr Dritt uff dr Subdominante C-Dur und foot mitem Punggdierte Schlaag aa. Värs 8 in c-moll bringt die abschdyygend Quart vom 7-te mitere Stauuyg und ere dryoolische Fortschbinnyg. Är blybt in c-moll. Värs 9 bringt s glyych Theema in C-Dur mitere draadizionelle Voordersatz in d Dominante, Noochsatz zrugg uff d Tonika. Im Schlussvärs blybt numme no, s Wäggselnooddemoddyyv vom Taggd 2 vom erschde Värs noonemol separaat uffznää und mitere 'Aeschlemer'-äänlige Seqquänz schliesst dä Marsch wo ainygi au ab und zue an die heerlige 'Glaybasler' derfty erinnere.