E vierschdtimmigs schalgghaft-freelygs Märschli mit e vyyle Iiberraschyge!
Värs 1 bringt s Haupttheema in G-Dur, en abschtyygends Jagdmoddyyv innere 3-Taggd-Perioode, anschdell vom aigentlyg 'korräggde' 9/8-tel isch dr schnäll 3/4-tel Taggd en erschty Iiberraschig und nochem 4-te Mool ischs aim beraits scho richtig drimmlig, so dassme de froo isch wenns am Schluss 4-4-tel stoppt und s zwaity Theema voorberaitet wird. S kunnt aim vor wie wenn die Clique verschloofe het, alli sinn z schboot und giebt het au niemerts so richdig. Värs 2 in C-Dur bringt anschtell vom Ringelraye im erschde Värs e fortschryttends Moddyyv als Umkeerig vom erschte Theema. Ally sinn yygschdande und geen d Stapfle duruff, kemme aber denn drioolisch ins Schnuufe und stolpere am Schluss no iibere 'Vaudois'! Obe aakoo wird im dritte Värs tapfer wytermarschiert, aber au dismool gheit noch zwai Täggd alles wiider iibere Huffe und ändet harmonisch chaootisch und drioolisch-synkopiert. Im vierte Värs isch denn ändlig au dr Tambourmajor uffgwacht und fiert s variierty zwaity Theema im schtabyyle F-Dur sogar suuber dur d Schlusssynkope! Noch soovyl Präzisioon sinn im 5-te Värs ally beraits wiider mied: In d-moll kunnts Ringelraye zrugg und numme mit Mie und Noot kunntme gmainsam zem Schluss und schdoot wiider yy! Fyyrlig und schtabyyl wird im 6-te Värs denn s zwaite Theema in g-moll voordrait und im 7-te kunnt denn au s erschty Theema faasnachtsmarsch-dauglich 'korräggd' uffschdyygend in B-Dur derhär und obwool sich dr Majoor e baarmol verschloot heere ally zämme in B-Dur und erscht no uffem richtige Fuess uff. Zem Schluss kunnt als Zämmefassig no e Wiiderhoolyg vom erschde Värs (die zwaite 2Mol in moll!) und noochem Napoleddaaner und dr Coda isch und sinn ally fertig!
Vyl Freyd bi däm ungweenlyge Marsch, bim Laufe goot alles uff, verschbroche!