E vierschdimmige Faasnachtsmarsch im tradizionelle Styl noocheme Kindermäärli woone iible Zwärg emene Prinzässly noochschdellt!
Noch all deene kompläggse und druurige Sache hani mer dänggt jetzt mues emol e tradizionelle Faasnachtsmarsch aane mitere unverwäggselbare Melodie und klare Abfolge
Eweng speziell isch woorschyynlig nur d Doonart g-moll wo dr Marsch, e Rondo, startet. S Theema isch e simply Dreyklangsbrächig, vor Quinte uffe zem Grunddoon, wiider zrugg und denn mit Durchgäng zer Terz und zem undere Grunddoon, aaschliessend mit 'Waggeldeen' vor Terz wiider duruff, Halbschluss uff dr Dominante, dr Noochsatz foot glych aa mit Ganzschluss in dr Doonart. Im klassische Styl folgt denn e glainy Segguänz mitem zwaite Moddyyv, eebefalls Halbschluss und Wiiderhoolig vom Noochsatz. Miteme neggische Yywurf fägt der Zwärg denn inn 2te Värs noch B-Dur won är noochere glaine abschdyygende Drioolesegguänz nomol stampft und sich denn im 3/4-Taggd in Es-Dur berueigt. Dr Värs schliesst ussghalte uff d Dominante, gfolgt vom ganze Rondodail, Värs 1. Jetzt kunnt dr Uffdritt vom Prinzässly: Iiberem Orgelpunggd Es im Bass wird im Värs 3 s erscht Moddyyv in Es-Dur duuregfieert. S Glyych bassiert im Värs 4 in c-moll iiberem Orgelpunggd G. E freelygs G-Dur lööst im 5te Värs s moll ab, s Prinzässly hipft und springt dur d Bluemewiise. Im Schlussvärs zwigg-zwaaggd dr Zwärg noonemol iiber d Biiny und e entschlosseny Coda bringt dr Marsch as Änd.
Ebb dr Zwärg s Prinzässly verwitschd het oder nit isch jeedem syre Fantasie sälber iiberloo :-)