E vierschdimmigs, schnälls Scherzo im 12/8-tel Taggd, gloffe wird in punggdierte Viertel
Dr Marsch het zway Hauptmoddyyv: Rhythmisch dr Trochäus, doonal die abschdyygend Doonlaitere. Dr erscht Värs bringt Baides (dr Trochäus eweng versteggd) miteme kanoonische Yysatz vo de vier Schdimme in dr Hauptdoonart G-Dur, goot im Vordersatz uff d Dominante und kunnt im Noochsatz wiider zrugg in d Hauptdoonart: Lyycht und beschwingt schdeen d Nussgnäggerly uff dr Theaterbiiny! Im zwaite Värs isch s G-Dur durs uffgleeste Fis beraits dominantisch, är bringt zerscht d Doonlaitere duruff und aaschliessend e Wäggselnooddebeweegig im unversteggte Trochäus. Noochem kanoonische Yysatz in C-Dur het alles au dert aane moduliert und ally steen berait fiire bâlettees Uffdritt! S Bâlett im dritte Värs im lieblige F-Dur bringt e Schbiilerey mitem vom Grunddoon zer Quinte fallende Tetrachord, die viert Schdimm versterggd duure kanoonisch versetzt Yysatz die scheen Vorwärtsbeweegig iiber E-7 noch a-moll. Aber Momänt, doo isch no ebbis vergässe: Iiber C-7 und die stoggendy Doonlaitere goots zrugg noch F-Dur: Jetzt sinn ally komplett fir d Ouverddyyre im 5-te Värs in B-Dur, frey noochem Tschaikowsky! Wiene stolzy Paraade kunnt dismool s Theema vom dritte Värs in B-Dur und goot wie vo elai iibere A-7 ins terzverwandte D-Dur. Miteme Gniggs kunnt Värs 7 denn ganz in D-Dur aa und im Finaale marschiere alli noonemol inere erwyterite harmoonische Kadänz iiber d Biiny. D Repriise vom Haupttheema wird wiiderum duurs uffgleest Laytdoon (dismool Cis) yylaited. Uss dr Tonika D-Dur wird d Dominante vo G. S kunnt e Repriise vor Värs 1-2 Kombinazioon, dismool blyybt aber alles in G-Dur und heert duure scheene Schlusspfyff fir ally Nussgnäggerely bravourees uff!
Komponischde sinniere und griible oft lang, mängmol aber goot alles wie vo Zauberhand und so ischs mer bi däm Marsch gange. Numme am Schluss biny denn ganz verdutzt doogschtande und hamer dänggt: Momänt mol, iirgend so ebbis hany doch scho emol gheert...! Vyl Freyd bim Pfyffe und loose!