E vierschdimmige Marsch-Delyyrium frey nochem Schubert sym 'Gretchen am Spinnrad'

 

Gschriibe im Fieberdelyyrium, dr Marsch isch dreydailig: 1. Värs 1-3, 2. Värs 4-5, 3. Värs 6-9 und entgeege de bishäärige Märsch Programmmusyg, het also e lineare Verlauf. Was em Greetly bassiert isch kamme im 'Faust' noochelääse, wies dr Schubert verdoont het kamme wunderbaar go loose.

 

Im erschde Värs in g-moll (ich lieb die Doonart fir Piccolo!) kemme beraits uff die baide erschde Schleeg im erschde Taggd die zwai Grundelemänt (zwai 16-tel und en 8-tel / zwai 8-tel in fallende Sekunde) wo dr ganz Marsch dominiere. Wills Achtelmoddyyv zwische de baide andere yyglemmt isch entschdoot zämme mit em Schtau und dr beschleynigte Segguänz in de Täggd 8-10 e groossi Unrue, fascht e beklemmends Gfyyl: S Greetly am Spinnraad waiss nimm yy und nimm us, dänggt numme no an Fauscht. Im zwaite Värs kunnt dur d Doonart B-Dur und durs wägfalle vom 16-tel-Moddyyv e Befreyig obwohl s 8-tel-Moddyyv, dails Drioolisch, dails ganz mit 16-tel und chromaaddisch durzooge isch: S Spinnraad schyynt, wie mit fremder Hand aadriibe, vo elai z gglabbere... Dr dritt Värs pändlet zwische A-Dur und g-moll, d Moddyyv sinn vertuschd und pändle nach obe: Wie im Delyyrium waiss s Greetly nid wie em gscheet und wos aanegoot bevors noochem D7 am Schluss vor zwaite Wiiderhoolyg wider uffwacht und sech immer no am Spinnraad wiiderfindet inn dr Wiiderhoolyg vom erschde Värs. Doodrmit schliesst dr erscht Dayl...

 

Im zwaite Dayl kunnt im vierte Värs ändlig dr Faust! S lieblige C-Dur, d Verlangsaamig und d Sekunde wo im Taggd 4 zwaimol uffstyyge entstoot e ydillische Yydrugg. Wär genauer loost und luegt merggd aber das d Unrue und Beklemmig vom erschde Värs genau glych doo isch: In de Täggd 1 und 2 kunnt genau s glych yyglemmte Moddyyv mit de abstyygende Sekunde, dismol aifach verlangsamt... Erschd s Verspräche vom Faust im Värs 5 erlööst s Greetly durs Wägfalle vom zwaite 16-tel-Moddyyv, die seensüchtige Iiberbindige im Verspräche und em Schluss in A-Dur am Änd vom zwaite Dail!

 

Dr Faust isch wiider gange und mit dr Otemloose Freyd und em Härzgloppfe vom Greetly (d Pause am Änd vo de Drioole) foot dr dritty Dail mitem Värs 6 in C-Dur aa. Durs Uffheebe vor Pause und e Wäggsel nach D-Dur wird alles no gschtaigeret und verggläärt! Im Värs 8 luegt s Greetly zem Fänschder us em Faust nooche, s erscht Moddyyv fiert jetzt die baide andere aa, und alles wird harmoonisch gschtaigeret bis zum Momänt won är si küsst het im letschde Taggd! Im Schlussvärs 9 isch nüt me beklemmends z spiire obwool ally Moddyyv wider so kemme wie im Värs 1. D Schlusssegguänz etabliert G-Dur als gligglygs Änd vor Gschicht!

 

Numme wär si genauer kennt waiss, dass dr Erscht dennoch zwingend mues wiiderhoolt wärde...

 

 

 

 

 

 

 

am Spinnraad (10.09.2019)