E vierschdimmigy, luperainy sizilianischy Tarantella firs wältoffene Basel, sempre 'con brio' und vyl Gligg!

 

Doo isch si, die luschtig-sälbschtiroonisch Variante vom Lockdown, dr Quaranddääne und dr Faas-Nicht 2020: Schnäll, virtuoos und fir ally wo mitmache oder loose au zem Mitschmunzle und -lache!

Wooni s Theema gstoole ha waissy nit, woorschynlig bi aim vo myne letschde Uffenthält uff Sizilie uffglääse. S kunnt im erschde Värs in a-moll drhär und goot nach e-moll, dr Bass macht Bum-bum-bum-bum, s Tempo 160 uffe punggdiert Viertel isch d Mindeschtgschwindigkait trotz dr Chromaaddig im zwaite Värsdail ;-)

Noochere Generalpause am Schluss kunnt dr klassisch 'Laaaa....mammamammamammamamma'-Rhythmus im zwaite Värs wo denn d Solischde driiber oder drunder yysetze dien: Zerscht, im schrille G-Dur 'La Nonna', denn, im Dritte, brobiert sech dr Babbe in e-moll z weere. Dr Viert isch denn wiider e 'Tutti'-Dail wo alles zrugg nach G-Dur fiert wo denn d Sooli, will si so scheen gsii sinn, wiiderholt wärde. Im Fimfte Värs versälbschtändigt sich d Rhythmusgruppe und maint dass si jo au ärnschdhaft ebbis z saage hätti: Nämlig in h-moll! 'Tutti' wird aaschliessend im 6te alles refleggdiert bevor die ganz Tarantella im 7te wiider vorne aafoot. D Schlussyywirf vo de Bäss fiere denn alles zumene heerlig-fulminante Schluss in e-moll.

 

Allne wos pfyffe winschy glyych vil Freyd wie mir s Komponiere gmacht het!

 

 

 

 

Quarantella Basileana (03.05.2020)