E vierschdimmige Marsch im Aadängge an groossartig Beery Batschelet

 

Ych ha dr Beery i däm Läbe laider perseenlig knabb verbasst... Ha sy Musyg und sy Wirgge aber guet gnueg verschtande dassmi d Noochricht dass är gange isch unglaublig druurig und bedroffe gmacht het: Do isch e ganz Grosse gange wo näbschd dr Lugge won är fir vyyli guete Frind hinderloot unglaublig vyl fir d Basler-Faasnacht gmacht und bewirggt het. Ych mecht an däre Stell au klar feschthalte dass miny aigene Sache ooni ihn, sy klangliche Sinn und syni musykaalische Konzept wo bis an d Gränze vom Machbare firs Basler-Piccolo gange sinn, nid hätte kenne entschdoo. Drum zieny my Huet e wyter mol und sag 'Danggscheen vylmol', Beery!

 

Dr Marsch het sich dr Gérald uff d Abdanggyg gwünscht und hetmer e Videouffnaam gschiggd wo dr Beery in Prag Faasnacht gmacht het mitem Lars. Die Baide hänn zur 'Moldau' vom Smetana improvisiert und so ischs denn my Uffdraag gsi, ebbis vo myne aigene Yydrigg vom Beery sym Schaffe mit däm Stigg z vergnipfe.

 

D Intro vom Marsch isch dr Aafang vom 'Slow Beery Slow', Taggt 1-2 nach a-moll transponiert und in 6/8tel gsetzt mitere Pause nochem erschde Akkord. Denn iibernäme die undere drey Schdimme im Trochäus, em Rhythmus vor Beglaityg bim Smetana. Dr erschti Värs isch e Transkriptzioon vor Melodie vom Smetana, drbii hani aber d Schdimmfieryg vom Video vom Beery mityybezooge. Im zwaite Värs isch s Theema underbroche, d Melodie in C-Dur schdygt wiene Umkeerig ab, und d Akkordschdellige sinn so gwäält dass es mystisch blybt. Värs 3 bringt d Repriise vom Theema mit dr Uffoorderig an die erschty Schdimm, frey derzue z improvisiere. Dr viert Värs isch denn völlig mystisch: Em Beery sy Schdimmfierig entschwäbbt iiber de abschdyygende Sekunde in de undere Schdimme wo wie d Glogge im 'Slow-Beery' sotte deene. Värs 5 bringt e schdraalendy Variazioon vom Smetana-Theema im Volksmusygschdyyl mit schnälle Drioole in A-Dur und ändet immene fir mi dybbische Beery-Yywurf wo i däm Fall nach fis-moll fiert. In Värs 6 wird dr zwaity Dail vom 5te (ab Taggd 62) in cis-moll duuregfiert. Är ändet in E-Dur. Värs 7 fiert vor Bassdoonlaitere aagfiert s Moddyyv duruff, die andere Schdimme bewege sich in brochene Akköörd bevors im Achte zer Repriise vom 5te mit dr Entlaadyg in A-Dur kunnt. Noch der zwaite Entlaadyg wo in moll ändet sagge d Drioole ab und dr Trochäus vom Smetana iibernimmt e letschds Mol. Nochere kurze Repriise und ere Generalpause im 9te wird s Theema vo de transkribierte Täggd 5-8 vom erschde Värs usem 'Slow-Beery' underbroche und d Musyg entschwäbt wie dr Maischder...

 

 

 

Nooruef (11.06.2020)